وكتبت باطما: "شكرا للصحافة المغربية لاهتمامها بأخبار عائلتي، شكرا لك أختي حبيبتي ابتسام على تشجيعك لي يخليك ليلي، وشكرا ماماتي على دعواتك لي ورضاكي علي أنت الأساس في نجاحي الله يحفظك ليا شكرا لجمهوري الرائع بدون استثناء ولي ما بغاكم تعمى عينو".
وأضافت "بالنسبه لبعض المتطفلين بالتويتر بغيت نقول ليكم ريحتكم عطات والشوشره ديال المراهقين مكتأثرش في نجاحاتي، لأن نجاحي طاغي جدا وهذا من فضل ربي وعمر لكتاف ميتقادو مع البراعم، وبالنسبة للجمال ماشي هوا دخل كراج للسباغة المائية وعدسات وزيد وزيد وتقول أنا زوين، الزين زين الفعل والأخلاق والأعمال الطيبة وملي تمشي لشي مهرجان أو قناة تخلي بلاصتك نقيه ماشي كلشي كيجيبو سيرتك ينزلو فيك سبان"، وذلك في إشارة منها إلى غضب الصحافة المغربية على ابتسام تسكت في مهرجان موازين في دورته الأخيرة بعد تعمدها التأخر في الصعود إلى المسرح في الحفل الذي جمعها معا إلى جانب فدوى المالكي.
وتابعت دنيا "جمال الوجه ليس بمعيار النجاح والثقه لي عارف راسو زوين را يحط تصاورو بدون مكياج وعادي، ماشي يحطها ويتخلع يصبح محيدها، ولي كيقول دنيا بطمة خيبه بغيت نقليه يوريني وجهو البوكوص وإذا أنا خايب يدير ربع لي وصلت ليه الحمد لله بخيوبيتي".
واسطردت دنيا "الزين را كيبرك فالدار، وملي كنمشي لمهرجان أو برنامج كنمشي كنجمة وليس كمبتدأة تحتاج للدعم، فيقو من نعاس حيت راكم عايشين الحلم الضائع، وجديدي مزيان واعر دارت ليكم العصب والشقيقه، ولي فقصاتو يتفضل يدير بحالها باش ميبقاش فيه الحال، وشكرا لأحلى فانزاتي الموذبين والمحترمين باقي ليهم بزاف المراحل باش يوصلو لمستواكم الراقي، ولو كان الكلام بفلوس تاواحد ميحل فمو والغيره كتهضر كنحبكم يخليكم ليا".
ووجهت باطما باقي رسالتها لجمهورها إذ قالت "متجاوبو تاحد ولي كيهضر علينا غير فاقسينو وباغي يشهر راسو مسكين على ضهرنا وكل يرى الناس بعين طبعه، خليكم فوق وخليو القاع للقاع، وسكوتنا ليس ضعف وإنما احتراما لفننا ولأنفسنا قبل كل شي أما را كاين ما يتقال القفه عامرا".
وذكرت باطما بالوسام الملكي الذي حصلت عليه قبل سنتين "لقد قدمت لبلدي ما اعترف به ملكنا الله ينصرو أكثر واحد يعرف ولاد بلادو لحرار، ماشي لي كيمثلو المغرب بالبوط عريان، ومازال العطاء مستمر حتى مماتي لبلدي وشعبنا الرائع ولملكنا الله ينصرو لينا".
وختمت باطما رسالتها النارية بالقول "وإذا كندعم شي حد فقط لحبي لوطني وكضربني النفس نشوف مغربي كيتبهدل، ماشي استفادة لأنني الحمد لله عرفت معني الفانز والجمهور والتلفزة والشهره قبل من أي واحد عاد عرف معنى شوية الشهره، وجمهوري وصلني للفينال ويكفي الاستقبال الملكي لي باقي مشفتش فحالو بوليس والدنيا واقفه للآن كنشوف غير تقليد فقط، ونصيحة لكل مقهور ملي تعصب اسمع جديدي مزيان واعر، وأغنية المغرب مغربنا الضربة القاضية جايا فالطريق، حنا كنجيو فاص مكنضربوش من لتحت، العز الحي المحمدي".
